UCHAWINI KUNA MAMBO

1.      Ukitaka ngia huko, wallahi utashituka

Utakutia vituko, vivyo navyo patashika

Utajutia kuwepo, na huruma kukushika

Uchawini kuna mambo, si kama yalivyo huku

2.      Vizuu wa uchawini, kiwaona tashituka

Tadhani ni hayawani, hali imebadilika

Si kichwa si miguuni, sura zao kama paka

Uchawini kuna mambo, si kama yalivyo huku

3.      Viongozi wa wachawi imeni imewatoka

Yao kwa hustawi, vizuu kupukutika

Ta siku moja haiwi, mmoja akasikika

Uchawini kuna mambo, si kama yalivyo huku

4.   Uchawini ni hatari, ukatili meongoka

Kuna watu majabari, tena wasotikisika

Wamekuwa majeuri, kwa kile wanachotaka

Uchawini kuna mambo, si kama yalivyo huku

5.      Ajira ya uchawini,  kama ya mkwe na kaka

Mavunoye huyaoni, ni viboko na kuchoka

Utaona kisirani, na akili kukuruka

Uchawini kuna mambo, si kama yalivyo huku

6.      Ukichoka uchawini, kamwe usijeropoka

Watakuweka pembeni, na njaa itakufika

Ubakie masikini , iwe huna pa kushika

Uchawini kuna mambo, si kama yalivyo huku

7.      Siku ukiwa na ombi, ndipo hapo utachoka

Waonekana cha zombi,  ulokosa pa kushika

Utakuwa cha mbirimbi, kwa kisu utakatika

Uchawini kuna mambo, si kama yalivyo huku

8.      Mwisho naliweka tojo kuonesha nimefika

Uchawini si porojo, kila mtu akacheka

Utanywishwa ta mkojo, watu kimya kukuweka

Uchawini kuna mambo, si kama yalivyo huku

NA: SALEH ZAHRAN ABDULLA- CHAWAKAMA-SUZA