BAHARI IMECHAFUKA

Bahari imechafuka,  samaki wakimbizana

Na hali ikachafuka ,  kuona wakipishana

Buhuri ikasikika ,  kama kwamba ni mchana

Wanaruka kwa hasira , samaki hawa jamani.

Wakubwa waliwacheka , wadogo zao kwa sana

Kuona wadhalilika , kukosa yao hiyana

Wengi wao kukereka , kuonewa na mabwana

Wanaruka kwa hasira , samaki hawa jamani

Furaha yao kufika , katika kila kona

Ingawa si ya mipaka, lakini yatakikana

Itakuwa  patashika , kelele kila namna

Wanaruka kwa hasira , samaki hawa jamani

Maji haya yazunguka , kwa wimbi lisonekana

Samaki mekushanyika , wamejazajazana

Mawimbi yanasikika , watu kazi kunong´ona

Wanaruka kwa hasira , samaki hawa jamani

Haya twende kwa haraka , samaki wakimbizana

Ni yetu hiyo sadaka , wakubwa watakikana

Muafaka kuweka ,  tusije hitalifiana

Wanaruka kwa hasira , samaki hawa jamani

Ndani ya hili shitaka , musije mukatuona

Ndimi zetu ni mashaka , kwa tunayoambizana

Ndo mimi na huyu kaka , tulivyokwisha nong'ona

Wanaruka kwa hasira ,  samaki hawa jamani

Tangu kale hadi leo , hatujaona lamana

Tena kwa ukali wao ,eti wanafokeana

Toeni zote komeo , tunataka kupambana

Wanaruka kwa hasira , samaki hawa jamani

Ajira sasa haziko , wapi zapatikana

Tunataka mabadiliko , hebu tizameni sana

Kutwa ni mahangaiko , usiku tunakabana

Wanaruka kwa hasira , samaki hawa jamani

Kama nyinyi hamuwezi , sisi tunatakikana

Kudai yetu agizi , kwa wanaotubana

Tunataka mageuzi , wazee pia vijana

Wanaruka kwa hasira , samaki hawa jamani

Vijana tuunganeni , kudai yetu hiyana

Ili tuishi duniani , bila ya kuoneyana

Wakubwa wamapangoni , wameridhika na ubwana

Wanaruka kwa hasira , samaki hawa jamani.


SAADA MABROUK JUMA- CHAWAKAMA SUZA